أنا عندى مشكلة نفسى حد يشاركنى فيها واسمع ارائكم
انا اتعرفت بشاب من خلال عمل مؤقت اول ما اتعرفت علية هو كان شخص ملتحى وانا كنت مش محجبة قربنا من بعض واتعرفنا على بعض اكتر وحبينا بعض وطلب منى انى البس الحجاب وانا لبست الحجاب وغيرت فى نفسى حاجات كتير اوى غيرت فى لبسى وفى تعاملاتى مع الناس واتغيرت نوعا ما بس ما وصلتش للمرحلة اللى هو عايزنى عليها لانة عايزنى البس النقاب وانا مش قادرة اعمل كدة خالص وفى اختلاف كبير فى الطباع بينة وبينى وبالرغم من كل الاختلافات دى الا ان احنا بنحب بعض اوى لكن انا مش قادرة اعمل اللى هو عايزة ولا هو قادر يتنازل عن النقاب
انا بحبة اوى وهو كمان هو راح لاهلى واتقدملى لكن اهلى معارضين عشان عارفين انى مش هكون مرتاحة
وانا تعبانة اوى ومش قادرة اسيبة ابدا حاولت كتير ابعد عنة لكن مش قادرة وخصوصا ان هو بيحبنى جدا وعمرى ما هلاقى حد يحبنى زية
انا عملت صلاة استخارة كتير اوى لكن كل ما نسيب بعض نرجع تانى والموضوع مالوش نهاية نفسى مش عارفة اعمل اية احاول اعمل اللى هو عايزة وانا مش مقتنعة بية واتخطب لة واجرب ولا اسيبة والحق الموضوع فى اولة انا خايفة اوى ومش عارفة اعمل اية ياريت حد يساعدنى ويحس بمشكلتى
--------------------
ودى كانت المشكلة اللى وصلت لبريد باب أفتح قلبك
بداية مش عارفة أعبر لك أزاى عن حاجات كتير جوايا بس هاخدها معاكى واحدة واحدة
أولا إنتى بتقولى أن الشاب اللى إنتى عرفتى ملتحى وأنا اللى أعرفه أنه الواحد اللى بيوصل للدرجه دى لازم يكون متدين جدا وحتى لو إنتى عجبتية المفروض كان يدخل من الباب على طول من غير ما تتكلموا مع بعض
الغريبه إنك كنتى غير محجبة وهو بص لك يعنى هو فيه عيب خطير أنه بيبص للبنات وعينه زايغة لأن المفروض أن الملتحى دة يكون ملتزم بدينه قوى ولا أيه
وكمان فضلتوا تكلموا بعض وحبيتوا بعض وأستمر الموضوع وكمان طلب منك أن تتحجبى وأنتى أتحجبتى علشانه
أولا موضوع أنك تتحجبى علشان حد مرفوض لأن إنتى المفروض تكونى مقتنعة بالحجاب
وثانيا هو الواضح أنه من النوع الأستغلالى وواضح أن شخصيتك ضعيفة جدا قدامه وده أكيد هيتعبك بعدين لو أرتبطوا لأنه بيستخدم معاكى أسلوب الضغط أنه يفضل يطلب منك طلب وما يسيبكيش الا لما توافقى عليه وده طبعا غلط لان كده شخصيتك أتعدمت
وكمان فيه أختلاف فى الطباع بينكم وعمركم ما هتتفقوا الحب لوحده مش كفاية علشان تتفق طباعكم وده اذا كان حب من الأساس
وبعدين هو طالب منك حاجات وانتى مش مقتنعه بيها يبقى أزاى هتكلموا حياتكم كده
الأحسن أنك تنهى الموضوع لأنه محكوم عليه بالفشل
ولو مش قادرة تنهيها ممكن تتخطبوا وصدقينى هتعرفى بنفسك أنكم ما تنفعوش لبعض
هو لو كان فعلا كويس ومتدين ومحترم كان دخل البيت من بابه على طول وكمان لما أهلك رفضوه كان المفروض يبطل كلام معاكى وإنتى كمان كان المفروض تنهى علاقتك بيه
وياريت فعلا تنهى علاقتك بيه
وزى ما قلت لك لو مش نافع تنهوا العلاقة أعملوا خطوبة وشوفى بس صدقينى نهاية العلاقة دى أحسن حل
----------------------
مستنين كل مشاكلكم على
---------------------
(bos bos) تحرير بسمه عبدالباسط
3 comments:
عجبني اوي ردك يا بسمة على المشكلة
هو فعلا ممكن يكون مستغل حبها لية وضعف شخصيتها يعني دلوقتي يطلب منها النقاب بعد كدة يحبسها في البيت
ومفيش واحدة اواي حد كانت عايش حياتة بحرية وتيجي فجاة تحبسية مش هيقدر يعيش
يعني زي العصفور الي متعود يطير بحرية وتيجي فجاء تحبسة في قفص هتلاقيه هايج وعاوز يكسر القفص لاما يرضي بحبسة ياما هيموت
وانا شايفة حاجة تانية انب بتقولي يا بسمة ان عينة زايغة وبيبص للبنات
لية منقولش ان من الاخوة الي بيعتروا ان النقاب فرض ولازم كل البنات تلبسة فهو شافها مش محجبة وفدخلها من مدخل الحب والزواج واهو يلبسها الحجاب وينقبها ويتجوزها وبكدة يبقى خد صواب فيها
بس بين وبينك في النهاية الحب بدون تفاهم واقتناع مش حب
انا شايفه انها مش بتحبه ولا حاجه هى مجرد حاجه جديده بتجربها وحاسه انها حب هي بس علشان لقت حد مهتم بيها وبيوجهها فهى حبه ده وحلو اوى ردك على الموضوع يا بسمه
بقول برده انتى من كلامك خايفه احسن يسيبك متلاقيش حد احسن منه او زيه وده مش سبب كافى يخليكى ترتبطى بيه
كمان الحجاب والنقاب دى شئ بتعمليه لله وبس مش عشان خاطر بشر شوفى ..تخيلى انك سبتيه وطلع خاين مثلا حتقلعى الحجاب والنقاب طبعا...يبقى انتى كده مش مقتنعه من الاول
انصحك انك تقوليله انك مش مقتنعه ولو هو بيحبك حيتفهم وجهة نظرك بسهوله.( مش العقده فى المنشار يعنى
الردود كلها حلوه اوى على فكره
ياريت تزوروا مدونتى المتواضعه الجديده فيها قصه مشابهه برده
Post a Comment